8 علامات تقول إن الشخص ده فعلاً يستحق ثقتك.. قبل ما تبدأ أي علاقة

الثقة مش كلمة سهلة.. هي حجر الأساس لأي علاقة ناجحة، سواء كانت صداقة أو حب أو شراكة عمل.

لكن السؤال الحقيقي هو: إزاي تعرف إن الشخص اللي قدامك يستحق ثقتك فعلًا؟

موقع “divineyouwellness” جمع مجموعة من العلامات النفسية والسلوكية اللي بتكشفلك إن الشخص ده أمين وجدير بثقتك مهما كانت طبيعة علاقتكما.

1- بتحس براحة وانت بتتكلم معاه

لو وجوده بيخليك تتكلم بحرية ومن غير خوف من الحكم عليك، فدي أول علامة على صدقه. الشخص الجدير بالثقة مش بيحاول يخبّي أو يوجّهك، لكنه بيسمعك ويخليك مرتاح تكون نفسك.

2- بيحترم حدودك

الناس اللي بتحترم حدود غيرها بتفهم معنى الأمان النفسي. الشخص اللي بيحترم خصوصيتك ومساحتك مش بيحاول يسيطر أو يضغط عليك، وده دليل على نضجه العاطفي.

3- عنده تعاطف حقيقي

مش بس بيسمعك، لكن بيحس بيك. بيقف جنبك وقت ضعفك وبيقدّر مشاعرك. الشخص المتعاطف مش أناني، ومش بيستغل أسرارك ضدك.

4- بيحترم الآخرين زي ما بيحترمك

راقب طريقته في الكلام عن الناس الغايبة. لو بيغتاب أو بيقلل من غيره، احتمال كبير يتكلم عنك بنفس الطريقة. الاحترام مش بيكون بالانتقاء، إنما طبع ثابت في كل المواقف.

5- صادق حتى لما الحقيقة وجعاك

الشخص الجدير بالثقة مش بيقول اللي يريحك، بيقول اللي يفيدك. حتى لو الحقيقة صعبة، بيختار يقولها لأن الصدق عنده مبدأ مش خيار.

6- بيبادلك الثقة

الثقة دايمًا طريق رايح جاي. لو هو بيشاركك أسراره وبيفتحلك قلبه، فده معناه إنه شايفك مكان آمن، وبيثق إنك هتحافظ عليه زي ما هو بيحافظ عليك.

 7- أفعاله بتأكد كلامه

الكلام الحلو مش كفاية، الأفعال هي الاختبار الحقيقي. الشخص اللي بيقول ويفعل هو اللي تقدر تعتمد عليه. الوعد عنده مش مجرد جملة، لكنه التزام.

8- بيعترف بغلطه

الناس الجديرة بالثقة مش بتبرر أخطائها، بل بتعترف بيها. لما يغلط، بيعتذر ويتحمل المسؤولية بدل ما يلوم الآخرين. وده بحد ذاته دليل على قوة الشخصية واحترام الذات.

وفي النهاية، الثقة مش بتُمنح بسهولة، لكنها بتُكتسب عبر المواقف. فخليك دايمًا واعي، وشوف اللي بيعمل إيه مش اللي بيقول إيه، لأن الشخص الجدير بثقتك هتكتشفه من تصرفاته قبل كلماته.