تسجيل الدخول

الشهيد أحمد حسنين .. بطل نال الشهادة قبل خطبته بـ4 أيام

2020-07-08T15:25:55+03:00
2020-07-08T15:26:23+03:00
أخبار سيناءأيقونات سيناوية
8 يوليو 2020آخر تحديث : منذ شهر واحد
 حسانين - وكالة سيناء نيوز

الشهيد ملازم أول “أحمد محمد محمود حسانين” من مواليد 5 ديسمير 1992 فى محافظة القاهرة.. دخل في أغسطس 2016 الخدمة العسكرية، وبعد ما اتخرج منها التحق بفرقة خاصة 999، وفرقة 777 لمكافحة الإرهاب، وبعدها التحق بالخدمة فى شمال سيناء كواحد من أفراد الصاعقة وكان متفوق في الرماية، وترتيبه الأول على مستوى وحدات الصاعقة..

خدم فى منطقة مطار العريش وبعدها رفح لما التحق بالكتيبة 103 صاعقة، وماكنش قايل لأسرته إنه بيشتغل فى سيناء عشان مايقلقوش عليه.. الفكرة إنهم عرفوا بعد فترة وطلبوا منه إنه يحاول يتنقل لمنطقة تانية بس هو رفض وقال: (أنا رايح علشان أجيب حق زميلى أحمد خالد زهران.. إدعولي ربنا يرزقني الشهادة زي زمايلي)..

اتربى عسكرياً على إيد العقيد أركان حرب “رامي حسنين” قائد الكتيبة 103 صاعقة، وبعد استشهاده أصر إنه يفضل مع الجثمان لغاية دفنه في مسقط رأسه فى البحيرة، وأكمل مسيرته في مكافحة الإرهاب فى سيناء تحت قيادة العقيد أركان حرب “أحمد منسي” لغاية استشهادهم سوا في كمين البرث..

كان آخر تواصل للملازم “أحمد حسانين” مع أسرته قبل استشهاده بساعات لما إتصل بيهم عشان الترتيب لخطوبته اللى كانت المفروض تكون بعد 4 أيام بالظبط وطلب منهم يعزموا كل أصحابه ومعارفه وقرايبه وماينسوش حد..

اللي جسد دور الشهيد “أحمد” فى مسلسل “الاختيار” هو الفنان “حسين كرارة”..
عاشت مصر، ورحم الله الأبطال الشهداء

رابط مختصر