تسجيل الدخول

الشهيد أحمد شبراوي .. البشوش الذي اختار قبره قبل إستشهاده

Agency Admin
2020-07-08T11:59:43+03:00
أخبار سيناءأيقونات سيناوية
8 يوليو 2020آخر تحديث : منذ 5 أشهر
الشهيد شبراوي

الشهيد “أحمد عمر الشبراوي” أسطورة حقيقية تستاهل يبقي إسمها مكتوب بحروف من نور فى عقل كل مصري.. “شبراوي” من مواليد محافظة الشرقية.. دخل الكلية الحربية، واتخرج منها سنة 2007.. اشتغل فى رفح لغاية سنة 2010، وبعدها راح الفرقة “777” فى الصاعقة المصرية..

تم إنتدابه فترة عشان يشتغل في هيئة قناة السويس، وأثناء الفترة دي ركب كل كاميرات هيئة قناة السويس، ومن 2010 لغاية 2013 فضل يخدم في الصاعقة الفرقة 777 لغاية ما اتنقل مرة ثانية لـ رفح ولغاية تاريخ استشهاده يوم 7 يوليو 2017..

“شبراوي” كان قائد السرية 103 في أثناء الهجوم علي كمين البرث فى العريش، وكان بيحب زمايله جداً لدرجة إن واحد من الضباط اللي فى الكتيبة حكى إن “شبراوي” وقت الهجوم كان بيقدم نفسه على زمايله وجنوده وبيخليهم وراه من خوفه عليهم، وإنه فضل يقاتل بشجاعة وقتل عدد كبير من التكفيريين..

كان متجوز وعنده طفل، واستشهد وساب وراه زوجته اللى كانت حامل فى الشهر السادس وولدت بعد وفاته بنت سموها “تالين” زي ما كان الشهيد “شبراوي” موصي.. من المفارقات الإنسانية إن “الشبراوي” اختار المكان اللي هيدفن فيه بنفسه.. قبل استشهاده بشهر كان في زيارة لعائلة والده فى قرية الشبراوين، وأثناء ما هو ماشي مع أخوه في القرية وقعت عينه على مكان من الأماكن، وبص لأخوه وقال له: (ياريت نشتري المكان دا يكون مقابر لينا)..

بعدها بأيام بسيطة سافر لشغله في سيناء مرة تانية، واشترى والده نفس المكان اللي اختاره ابنه، من غير ما يكون عارف إن إبنه كان المكان عاجبه!.. اتفق الوالد مع العمال على بناء المقبرة صباح يوم الجمعة، ومجرد ما انتهوا من بنائها وصل له خبر إستشهاد إبنه وجه الجثمان يوم السبت وتم دفنه..

الفنان “كريم عبدالجواد” هو اللى جسد دور الشهيد “أحمد شبراوي” فى مسلسل “الاختيار”.

عاشت مصر، ورحم الله الأبطال الشهداء.

رابط مختصر