زيزو: ظهورى فى السفارة الأمريكية«غلطة».. وصورى اترمت واتداس عليها بتعليمات من مجلس الزمالك

أكد أحمد مصطفى زيزو، لاعب الأهلي الحالي، إن ظهوره في السفارة الأمريكية كان أكبر خطأ ارتكبه السنة اللي فاتت، وإنه ماكنش متخيل إن الناس هتربط الخطوة دي بمفاوضاته مع الأهلي.

وقال إنه كان بيجهز للتأشيرة تحسباً لعروض من أندية مشاركة في كأس العالم، وإنه حتى لو ماكنش راح الأهلي، كان ناوي يسافر يتفرج على المباريات.

وأضاف زيزو إن مفاوضات الأهلي بدأت في الوقت القانوني، وإن نادر شوقي، وكيله، هو اللي تفاوض مع والده، وإنه نفسه ماكانش يعرف إن الأهلي بيتفاوض غير في توقيت متأخر.

وأكد إنه مااتكلمش في الفلوس وقتها، وإنه كان عنده عروض من أندية في السعودية، العين، والوكرة.

وكشف زيزو عن واقعة صادمة حصلتله في الزمالك، لما أحد العاملين في النادي نزل صورته من على الحيطان، ودهسها وبصق عليها، وقال إنه مستحيل ده يحصل من غير ما يكون وراه تعليمات من مجلس الإدارة.

وأكد كمان إن الشتيمة اللي سمعها في المدرجات كانت سبب في إنه يقرر إن العلاقة انتهت.

وعن موقفه قبل مباراة الزمالك وستيلينبوش، قال زيزو إن بيسيرو طلب منه ميريّحش ويلعب، لكن المدرب قال له إن فيه قرار إداري بمنعه من المشاركة، وإنه بعدها اضطر يتدرب لوحده.

وشدد زيزو إنه وقتها ماكانش مضي للأهلي، واللي عنده إثبات يقدمه، لأنه كان لاعب حر وعنده 3 عروض من أندية كبيرة.

وفي النهاية، وضّح إن عقده مع الأهلي بعيد تماماً عن الأرقام اللي الناس بتتكلم عنها، وإن عرض الزمالك كان أعلى، بس هو اختار الأهلي لأسباب تانية.

ووجه زيزو رسالة لجمهور الزمالك، قال فيها إنه فخور بتاريخه مع النادي، وهيفضل دايماً يشرفه إنه كان جزء من الكيان ده.