طرق للحصول على أصحاب وإنتِ مغتربة.. قواعد ذهبية للتأقلم داخل السكن الجامعي

مع بداية الدراسة الجامعية، يصبح البحث عن السكن خطوة أساسية، خصوصًا للطلاب المغتربين.

لكن الإنتقال للسكن الجامعي مش بس تجربة جديدة مليانة حماس، كمان محتاجة قواعد وأسلوب تعامل يضمن راحة وسلام للجميع.

شريهان الدسوقي، خبيرة الإتيكيت والعلاقات الإنسانية، شاركتنا أهم النصائح للتعايش الناجح داخل السكن الجامعي:

إحترام الخصوصية:

حتى لو الغرفة مشتركة، لازم يكون لكل شخص مساحته الخاصة. ماينفعش تلمسي حاجات غيرك من غير إذن أو تزعجي وقت راحتهم أو مذاكرتهم.

النظافة مسؤولية جماعية:

أي مكان مشترك زي المطبخ أو الحمام لازم يفضل نظيف. ده مش بس بيريّحك إنتِ، كمان بيمنع خلافات يومية ممكن تحصل بسبب الإهمال.

الصوت الهادئ:

سواء بتتكلمي في الموبايل أو بتسمعي مزيكا، حافظي على مستوى الصوت منخفض، خصوصًا وقت المذاكرة أو النوم.

المشاركة بذكاء:

تبادل الأدوات شيء طبيعي، لكن لازم يكون في حدود وبتفاهم مسبق عشان ما يتحولش لإستغلال.

المرونة والتفاهم:

التعايش مع طباع مختلفة محتاج شوية تنازلات صغيرة ومرونة عشان الحياة اليومية تمشي بسلاسة.

روح الزمالة:

السكن الجامعي فرصة كبيرة لبناء صداقات تدوم سنين. الود واللطف بيخلوا العلاقات صحية من غير مصالح.