تسجيل الدخول

ماينفعش تُلدغ من جحر مرتين، فما بالك بـ10 مرات؟

Agency Admin
2020-07-11T01:29:47+03:00
أقلام حرة
11 يوليو 2020آخر تحديث : منذ 5 أشهر
صقر سيناء

ماينفعش تُلدغ من جحر مرتين، فما بالك بـ10 مرات؟

اللعب بورقة الدين مش سياسة جديدة أو مفاجأة علشان نستغربها أو ننخدع فيها، وأساس اللعبة دي إنه يغلف الهدف السياسي بالدين، فاللي يرفض يتقال له هو انت زعلان من المسجد في ايه؟

شوفت اللعبة بتتعمل ازاي؟ حرفنة بردو.. بس خلاص بقى من كتر ما هي اتكررت حفظناها..

بشكل مبدئي كده، القرآن بيقول لنا إن النوايا اللي ورا بناء المسجد ممكن تحوله من بيت ربنا، لمسجد ضرار، ففكرة إنك تحط يافطة المسجد علشان تخفي نواياك والمفروض إننا نبلع الموضوع باعتبار إن الشنطة فيها كتاب دين، هي فكرة بينسفها الدين نفسه..

مفيش حاجة هتضاف للإسلام ولا المسلمين، ولا هتقل من غير المسلمين لما يتحول آيا صوفيا من متحف لمسجد، ده من الناحية الدينية، لكن لازم يتشاور على اللي عمل كده لإنه بيستخدم الورقة دي في لعبة سياسية علشان يغطي على أزمة اقتصادية غير مسبوقة في حكمه، ده غير التجاذب السياسي الشديد وانقلاب حلفاء سابقين أقوياء عليه..

طبعا ده غير الرسالة السلبية اللي بيوجهها إردوغان لكل الدول في المنطقة، أنا عثماني مجرم واللي عندكم اعملوه..

المشروع التوسعي التركي مبني على أعمدة عقائدية، حضرتك بتشوف الوجه القبيح الفج من المشروع في تصرفات زي دي، مش هدفها الدين خالص لإن الدين مش مستني متحف يتحول لمسجد، لكن هدفها جذب قاعدة الناخبين اللي تصرف ضحل زي ده ممكن يبقى إنجاز فظيع بالنسبة لهم..

الغريب إن إردوغان اعتبر إن تحويل آيا صوفيا لمسجد بشارة لفتح المسجد الأقصى.. ماتفهمش بردو ايه الإنجاز والمجهود الفظيع اللي حصل في موضوع آيا صوفيا علشان يتقارن بالمسجد الأقصى!

رابط مختصر