انتقد نجم منتخب مصر السابق و الإعلامي أحمد شوبير، المعلقين الرياضيين في طريقة تعليقهم على مباريات كرة القدم، سواء في الدوري المصري أو في الشبكات والقنوات العربية والعالمية.
وقال أحمد شوبير: رسالة والنبي لأخواننا المعلقين ربنا يبارك لكم وأنتوا بتعلقوا على المباريات أنا مش مستني أعرف اللعيب ده راح فين وأبوه كان بيلعب فين وبعدين خالته اتبنته وبعد ما اتبنته اتخانقت مع مرات خاله فمرات خاله حلفت يمين ما تقعده في البيت فساب البيت وبعدين وهو طالع لقى مدرب خده.. وفجأة تلاقيه قال لك: جووووون.
وتابع شوبير: يا راجل خليك في الماتش حلو قوي مدرسة المعلومات دي لكن أنت في الأساس بتعلق على جانب فني، بتلاقي المعلق من دول واخدك في قصة وحدودتة وفجأة تلاقي بيقول لك الهدف الأول طيب فين الوصف يا باشا المباراة ده شغلك وده التعليق اللي احنا اتعلمناه.
وأضاف شوبير: أنت مش طول الوقت هتفضل تديني درس واللاعيب ده اتنقل من نادي كذا لنادي كذا، يا عم الكرة بتقف كثير ابقي قول الكلام ده لما الكرة تقف، انما الماتش شغال حضرتك اشتغل لي فني لإن الامر زاد جدا عن الحد الصراحة.
